Ақтөбелік адвокаттар: Кәсіби қызметімізге кедергі жасалды

Ақтөбелік адвокаттар: Кәсіби қызметімізге кедергі жасалды

Ақтөбедегі адвокаттар алқасы 4 желтоқсан күні кешкілік баспасөз мәслихатын өкізді деп хабарлайды Азаттық тілшісі. Оған қатысқан 40 шақты адвокат алқа төрайымы мен жергілікті адвокаттарға кәсіби қызметімен айналысуға кедергі жасалып жатқаны туралы айтты.

— Ақтөбеде сот шешімімен үш адвокат лицензиясынан айырылды. Ендігі кезек адвокаттар алқасының төрайымы Раиса Якубенкоға жетіп отыр. Раиса Якубенко Қазақстанда «Адвокаттар қызметі және заң көмегі туралы» заң жобасының қабылдануына белсенді түрде қарсы шыққан адам. Адвокаттардың тәуелсіздігін шектейтін бұл заң жобасына біз де қарсымыз. Раиса Якубенко жоғарыға біздің дауысымызды жеткізуге тырысты. Сол үшін лицензиясынан айырылмақшы, — дейді адвокат Жүсіпбек Жанұзаков.

Баспасөз мәслихатына Ақтөбедегі адвокаттар алқасының төрайымы Раиса Якубенконың өзі қатысқан жоқ. Ұйымдастырушылардың айтуынша, баспасөз мәслихатынан бір күн бұрын Ақтөбеде адвокаттардың шұғыл кеңесі өткен. Кеңесте адвокаттар лицензияларынан айырылып, кәсіби қызметпен айналысу қаупі барлығына төніп тұрғанын айтып, баспасөз мәслихатын өткізу туралы шешім қабылдаған.

Ақтөбе облыстық адвокаттар алқасының 150 мүшесі бар.

Биыл қазанда 500-ден астам адвокат Қазақстан премьер-министріне үндеу жолдап, «Адвокаттар қызметі және заң көмегі туралы» заң жобасы әділет министрлігі дайындаған күйінде қабылданбауы тиіс екенін мәлімдеген. Қазір заң жобасы парламент мәжілісінің қарауында жатыр.

Заңгерлердің халықаралық комиссиясы (International Commission of Jurists — ICJ) желтоқсанда Астанада өткізген баспасөз конференциясында аталған заң жобасының біраз баптары тәуелсіз адвокаттық қызметті шектеуі мүмкін екенін және өзін-өзі реттейтін ұйымдардың құрылуына мүмкіндік бермейтінін мәлімдеген.

1 пікір


  1. АДВОКАТ мырзалар, мына істеріңізден ештеңе өнбейді. Құқықты мемлекетте қандай құйтұрқылықтар жүріп жатқанын СІЗДЕР жақсы білесіздер. Және оны реформалау керектігі бізден гөрі тағы да Сіздерге жақсы мәлім. Бастарыңызға түскен «Жалқы» мәселені шешу үшін, әуелі «Жалпы» мәселені шешіп алу керек. Заңға (құқықтық актілерге, кодекстерге) демократиялық өзгерістер қажет. Бір органға, бір адамға басыбайлықтан құтылу қажет. Ендеше осы саланың білікті, кәсіби мамандары ретінде өздеріңіз бас болып сот, жалпы қазақстандық құқық жүйесіне шынайы реформа қажеттігін неге көтермейсіздер. Сонда мәселенің бәрі өздігінен шешіледі.

    Жауап беру

Пікір қалдырыңыз