Бүгінгі күннің батырлары: Ақтөбедегі «Нұр Ғасыр» мешіті мүмкіндігі шектеулі жандарға дастархан жайды


Облыстық мешіт қаладағы халал мейрамханалардың біріне 50 адамға қайырымдылық дастарханын жайып, ілтипат көрсетті, деп хабарлайды Aktobenews.kz тілшісі.

Мұнда мейман ретінде шақырылған жанұя мүшелері – ерекше жігерлі жандар. Себебі, олардың әр күні – күреске толы. Олардың қатарында – арбаға таңылған баласына қамқор ана, мүмкіндігі шектеулі жолдасының жанынан табылған адал жар, немерелеріне бас-көз болып жүрген батыр әже де бар.

«Білген жанға, батырлық – сауыт киіп, соғысқа аттану ғана емес. Бауыр еті балаңа түскен сынақты бөлісе көтеріп, оның мүмкіндігінің шектеулі екендігін сездірмеу, «қол-аяғы» да, қолғанаты да болу — тағдыр майданында тайталасқанмен тең. Олар — сол үшін де бүгінгі күннің батырлары…», — деп жазады мешіттің баспасөз қызметінен.

Өкіл имам Төлеби Оспан отбасындағы береке мен бірліктің, өзара түсіністіктің болуы жанұя мүшелерінің ынсаптылығынан, бақыт пен байлықты материалдық құндылықпен ғана шектемей, бас амандығы бар әр күнді бағалай білуден басталатындығын тілге тиек етті.

Тәңір жазған сынаққа сабырлықпен төтеп беріп келе жатқан сырқат жандар мен олардың жанұяларына Алланың рақымын тілеп, дерттеріне шипа бұйырсын деп дұға етті. Бүгінгі тоқшылық заманды «алтын ғасыр» деп атаған Роза әжей де жас отбасыларға өсиетін айтып, басты байлық – денсаулық деген ойын жеткізді. Дәм басында басқа да тағылымды әңгімелер, отбасының құндылықтарын сақтау жайында айтылды.

Шара соңында «Нұр Ғасыр» облыстық орталық мешітінің «Сен де үлес қос!» қайырымдылық акциясының атынан әр отбасыға естелік сыйлықтар сыйға тарту етілді.

Пікір қалдырыңыз